November 22 & 23, 2024 khan  CASA national board meeting New Delhi -ah neih a ni a, He Meeting-ah hain BCM R&D Coordinator pawh BCM aiawh a member a nih angin a tel.  tun tum Meeting-ah state hrang hrang atangin member 21 an tel bawk. Meeting hi National Director Mr. Sushant Agarwal an akaihruai a ni.

Tunkar Thawhlehni atanga Zirtawpni, November 26-29, 2024 chhung khan  Christian Hospital Serkawn chuan Rev. K. Lalnunsanga  Speaker-a hmangin Thawktu te leh zirlai te pualin Intuaitharna (Retreat) an nei.   Christian Hospital, Serkawn-a thawktute hi Duty pawimawh tak tak nei an nih avangin, ruahmanna siamin thawktute chu batch hnih-ah inthenin, ni hnih ve ve hun hmangin, Damdawiin inenkawlna leh duty ti buai lovin Retreat hi ruahman a ni.

Jubilee Bible School (JBS) Serkawn chuan November ni 22 atang khan Final exam an nei mek a, ruahman sa ang chuan, December 2, 2024 khian Exam hi an zo fel ang. Exam  zawh hnuah December 4 atangin Practical Ministry neiin Thenzawl-ah hun an hmang ang a, December 17-ah Graduation programme hman a ni ang.  JBS-a Regular Class bakah hian Correspondent Course - Bachelor of Christian Studies batch hmasa berte chuan November 16, 2024 khan Final Year exam an lo zo tawh a ni.

Upa M.S.Dawngliana Zongte, Archivist, BCM Headquarters Office chu December 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten November 26, 2024 (Thawhlehni)chawhnu dar 2:30 khan BCM Hall-ah amah thlahna an nei

November 26, 2024 (Thawhlehni) khan District Child Protection- WCD Lunglei leh Baptist Child Resources Centre (Specialised Adoption Agency) te buatsaihin Baptist Church Orphanage(BCO), Serkawn-ah Foster Families Appreciation Day hman a ni.

November 20 leh 21, 2024 khan Senate of Serampore Collage (University) Board Meeting leh Senate Meeting,  cuu Baptist Theological College, T. Chikri, Pfutsero, Nagaland-ah neih a ni a. BCM atanga Board member leh Senate member Rev. R. Lalnunzira, AGS Service leh Rev. Dr. Vanlaldika, Principal, AICS te heng meeting-ah hian an tel a. November 22, 2024-ah Commemoration Service leh Convocation neih a ni a, BCM atangin Rev. Joe Laldinpuia pawhin Doctor of Theology (D.Th) degree a dawng a ni.

Serampore Convocation November 22, 2024-a Baptist Theological College, Pfutsero, Nagaland-a neih ah Senate of Serampore College (University) chuan Rev. Joe Laldinpuia, Asst. Professor, AICS chu Doctor of Theology a hlan. Rev. Joe Laldinpuia'n Doctrate Degree a lakna (a doctoral dissertation title) chu “Divine Retribution in the Book of Job and its Contextual Relevance for Mizo Society” tih a ni. Rev. Dr. Joe Laldinpuia hian kum 2019-2023 chhûng khan D.Th (Old Testament) hi United Theological College, Bangalore-ah a zir a, kum 2022 khân a research tih chhunzawmin Princeton Theological Seminary (PTS), New Jersey, USA ah Doctoral Research Scholars Program (DRSP) tiin a zu awm bawk a ni. Tunah hian Thuthlung Hlui leh Hebrai tawng zirtirtu niin AICS ah an chhûngkuain an awm mêk a ni.

Mizoram Baptist Kohhran – Area Baptist Council (ABC) Rorel leh Inkhawmpui chu November 22 - 24, 2024 chhung hian ABC 17-ah neih a ni dawn a. November 22, (Zirtawp) zan atangin Inkhawmpui hi tanin, Inrinni nilengin ABC Rorelna neih a ni ang, ABC Executive Committee thute bakah Pastor Bial  atanga Agenda lut te, ABC kal tlanga Assembly 2025-a thlen tura chhawpchhuah te ngaihtuah a ni ang.

November 5, 2024 Chawhma dar 10:00 khan kum 2025 BCM Calendar leh Diary chu BCM Hall, Serkawnah Rev. Dr. R. Lalbiakliana, General Secrcetary-in Pathian hnenah hlanin, a tlangzarh. Tlangzarhna hun tawi ah hian Rev. Dr. Lalzarliana, Director, Communications Department-in Calendar leh Diary buatsaih dan tlangpui a sawi bawk.

Tunkar Nilaini leh Ningani (20&21 November, 2024) hmang khan Fellowship Department –in Planning-a an dah leh ruahman angin Aizawl Area KNP te pualin Winter Camp buatsaih a ni a. He Winter Camp ah hian thupui ‘Isua ka thlang’ tih a ni a, Murray’s Resort-ah neih niin Aizawl Area chhunga KNP member 165 leh hruaitu 30 zet an tel thei a ni.

November 11 - 15, 2024 chhung khan Asia Pacific Baptist Aid (APBAid) buatsaih - Micah Connect Asia 2024, Kathmandu Nepal-ah neih a ni a. Hetah hian BCM R&D atangin Nl. T. Lalfawnveli, Asst. Coordinator leh Tv. Zosangzela Zongte, Assistant, Executive Secretary Office, Aizawl te an tel.

Vawiin, November 18, 2024 khan Lunglei DC kal chhuak tur Pu R. Lalthazuala chuan BCM Office rawn a tlawh a. DC hi Pu James Miahlung, Addl. DC leh office staff thenkhatin an rawn tawiawm a ni.

November 17 (Pathianni) kha ‘Naupangte Ni’ a ni a. Kumin Naupangte Ni thupui chu ‘Naupangte leh Rawnbgawlna” tih a ni. Hemi ni hian tualchhung kohhran tinah naupangte ni thupui hmang hmangin naupangte enkawl leh kaihhruai kawnga nu leh pate mawhphurhna lam thuchah ngaihtlain hun an hmang a, Headquarters atanga Nuapangte Ni a chhiar tur buatsaih chu chhiarchhuakin, naupangte Item hrang hrang hmanga an rawngbawlna te ngaihthlak a ni bawk.

Vawiin, November 15, 2024 (Zirtawpni) chawhnu dar 1:00 khan School of Nursing, Christian Hospital, Serkawn chuan BCM Hall, Serkawn-ah ‘Graduation and Lamp Lighting Ceremony an hmang a. Rev. R. Lalnunzira, AGS Service, BCM chu khuallian niin, zirlai te leh anmani tawiawmtu an chhungte bakah sawm bik mi thehnem tak an tel a ni.

November 12 leh 13, 2024 khan BCM Thingkah, Lawngtlai North Pastor Bial chuan an Kohhran kum 100 tlinna (Centenary) an lawm a. Headquarters atangin General Secretary Rev.Dr.R.Lalbiakliana bakah Rev. Dr. F. Lalsangliana, Editor, Kohhran Beng & Baptist Today leh Rev. H. Lalfakzuala, MBMP Secretary ten Centenary hi an hmanpui a, Lawngtlai atangin BCM President Rev. F. Ramdinmawia leh Executive Secretary Rev. Dr. H. Lalthlamuana te, Pu FC Lalhualhima, Production Assitstant BCM AV ten he hun hi an hmanpui bawk.