Mizoram Baptist kohhrana thawktu te chuan January 8, 2025 (Nilaini) chawhma dar 11;30 khan In hlan tharna hun an hmang. Lunglei-ah chuan Headquarters Office, Serkawn leh Lunglei khawpui chhunga kohhran zirna in leh Office hrang hranga thawktute puala inhlantharna hi BCM Hall Serkawn-ah an nei a, Upa Dr. Lalramzauva, Directo,r Medical & Health Department-in inkhawm a kai hruaia, Pi C. Lalawmpuii, Principal, BES Serkawn in Pathian thu chhiarin tawngtaina a neih hnu ah General Secretary Rev.Dr. R. Lalbiaklianan thawktute lawmna leh chibai bukna sawiin, BCM dinhmun leh hmalakna tlangpui a tarlang bawk.

January 7.2025 (Thawhlehni) ni khan Mizoram Baptist kohhran chuan kumthar atan Office kai ni hmasa ber hmangin Office an hawng tan leh ta. BCM Thawktu hmun hrang hranga Christmas leh kumthar hmanga zin chhuakte leh mahni hmun lama haw te pawhin Office kai ni hmasa ber hi ngai pawimawhin an rawn haw kim thei vek a, thawktute zingah damlohna avanga kal thei lo Duty pawimawha kalte tih loh chu Office an kai tha hle.

Mizoram Baptist Kohhran hnuaia thawktu Department hrang hrang-a nitin Office kal te chuan December ni 18, 2024(Nilaini) atangin Krismas leh Kumthar chawlh an hmang tan dawn a. Hemi chhung hian Headquarters Office, Executive Secretary Office, Lawngtlai leh Aizawl te, Institution leh Department Office dang te chu khar a ni ang. Chutih laiin, Hospital lam te, ChhawmAwlna In te, Centre leh Homes te chu anmahni inenkawlna tibuai lovin Department hotute ruahmanna siamin a tul angin Office an la kai ang a, Duty leh hna kallai pawh a pangngaiin an kalpui zel dawn a ni. BCM Calendar-a tarlan angin, Kumthar January ni 7, 2025 (Thawhlehni)-ah Office hawng lehin, January ni 8, 2025 (Nilaini) ah thawktute inhlantharna Programme hman a ni ang.

NAAC (National Assessment and Accreditation) Council, India rama college tha tehna pawimawh ber pakhat ani. HATIM hi Mizorama Non-governmental college zirna in zinga NAAC endikna hmachhawn thei hmasa ber an ni.

December 10-12, 2024 chhung khan ‘Inpumpek’ tih thupuia hmangin Chakma Baptist Church Pastors Meet vawi 4-na chu CBC Biak In, Town Church, Kalamanager-1, Chawngte ‘C’-ah neih a ni a, Speaker leh Resource person-ah Rev.Dr.C.Lalruatthanga, Exe.Secretary, CBC te, Rev. Dr. H. Lalthlamuana, Executive Secretary, Lawngtlai te, Upa K. Lalrohlua, Finance Director, BCM te hman an ni.

December 11, 2024 (Nilai) Dar1:00pm khan MṬKP Rorel bawhzui in Christian Hospital Lawngtlai ah Operation Theater Table leh Adjustable table puala MṬKP member ten sum an thawhkhawm chu MTKP hruaitute a hmunah kalin an hlan. MTKP hruaitute hi ṬKP Lawngtlai Area hruaitu ten an tawiawm a ni.

December 10, 2024 (Thawhlehni) khan BCM Relief & Development Department hnuaia Skill Development Training hrang hranga zir chhuak mi 32 pualin R&D Training Centre, Ramzotlang-ah Graduation Day hman a ni a.  Rev. R. Lalnunzira, AGS – Service chu chu khuallian-ah hman a ni

December 9, 2024 (Thawhtanni) chawhnu dar 1:30 khan Higher And Technical Institute, Mizoram (HATIM)-ah Academic Building thar chu Rev. Dr. R. Lalbiakliana, General Secertary chuan hawngin Rev. R. Lalnunzira, AGS-Service-in Pathian hnenah a hlan. HATIM Academic Block C hi March 15, 2019 khan hetih laia Associate General Secretary-Service-Rev. R. Zohmingliana’n lungphum phumin sak tan a ni a. Building hi feet 133 leh feet 46 a lian niin, tunah hian chhawng 3 thlen sak zawh a ni a, tun thlenga building sak nana sum sen tawh chu cheng nuai 300 chuang hlek a ni a, he building hi chhawng 6 a sanga sak turin ruahman a ni..

Fellowship Department –in Planning-a an dah leh ruahmanna an siam angin BCM-a Area hrang hrang – Aizawl, lawngltei leh Headquarters Area-ah te Winter Camp buatsaihin neih chhoh mek a ni a. December ni 3 leh ni 4 (Nilaini leh Ningani) hmang khan Lawngtlai Area ah pawh KNP Winter Camp hi buatsaih a ni a. He Winter Camp hi Tawngtaina Tlang, Lawngtlaiah neih a ni a, KNP member 170 chuang zet an kal khawmin Zirtirtute leh puipate nen mi 200 chuang an tel thei a ni. He hunah hian KNP Promoter Nl. K. Lalramthianghlimi te, Pu Muansangpuia, Tv. Ivan R. Lalrindika, KNP Trainer leh Nl. Dindini te Resource person niin naupang te kawng hrang hranga zirtirna leh thiam thil hrang hrang zirtirna  an nei a ni.

Mission Working Committee No – 12 (5th December 2024) chuan BCM Mission Board Committee in thuneihna a pek angin a hnuaia tarlan missionary lak tharte leh JBS a training zo tawhte thawhna tur hmun a siamfel. Missionary tharte hian February 2025 chhungin an thawhna tur hmun an pan ang a, JBS a training zo tawhte chuan January 2025 chhungin an thawhna tur hmun an pan ang.

December 1, 2024 hi khawvel pum huapa Kristiante Ni Pawimawh “Bible Sunday” a ni a, Mizoram Baptist Kohhran pawhin he Ni hi urhsun takin a hmang thin a,  Tualchhung Kohhran tinah Bible Society rawngbawlna lam thuchah leh campaign nan hmangin, Bible Society hmunpui atanga chhiar thuchah chhiar tura buatsaih te chhiarin hun hman thin a ni.

November 22 & 23, 2024 khan  CASA national board meeting New Delhi -ah neih a ni a, He Meeting-ah hain BCM R&D Coordinator pawh BCM aiawh a member a nih angin a tel.  tun tum Meeting-ah state hrang hrang atangin member 21 an tel bawk. Meeting hi National Director Mr. Sushant Agarwal an akaihruai a ni.

Tunkar Thawhlehni atanga Zirtawpni, November 26-29, 2024 chhung khan  Christian Hospital Serkawn chuan Rev. K. Lalnunsanga  Speaker-a hmangin Thawktu te leh zirlai te pualin Intuaitharna (Retreat) an nei.   Christian Hospital, Serkawn-a thawktute hi Duty pawimawh tak tak nei an nih avangin, ruahmanna siamin thawktute chu batch hnih-ah inthenin, ni hnih ve ve hun hmangin, Damdawiin inenkawlna leh duty ti buai lovin Retreat hi ruahman a ni.

Jubilee Bible School (JBS) Serkawn chuan November ni 22 atang khan Final exam an nei mek a, ruahman sa ang chuan, December 2, 2024 khian Exam hi an zo fel ang. Exam  zawh hnuah December 4 atangin Practical Ministry neiin Thenzawl-ah hun an hmang ang a, December 17-ah Graduation programme hman a ni ang.  JBS-a Regular Class bakah hian Correspondent Course - Bachelor of Christian Studies batch hmasa berte chuan November 16, 2024 khan Final Year exam an lo zo tawh a ni.

Upa M.S.Dawngliana Zongte, Archivist, BCM Headquarters Office chu December 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten November 26, 2024 (Thawhlehni)chawhnu dar 2:30 khan BCM Hall-ah amah thlahna an nei