February 10-18 chhung khan Mizo Christian Fellowship of Malaysia te zing ah rawngbawlna hi neih a ni a, an hun hmanna hi Kualalampur Baptist Church ni in, Chinese Baptist ho biak in a ni. Member hi 250 atanga 300 vel ni in, member lut chhuak hi an awm ve deuh reng a ni. Malaysia mizo baptist te zinga rawngbawla hun hman a nih chhung hian chhun lamah Bible Study vawi hnih zel neih thin a ni a, hetah hian mi 20 atanga 30 regular takin an tel thin a. Zan lamah Pathian biak inkhawm hun hman thin a ni a, hetah hian mi 80 atanga 100 an kalkhawm thin bawk. Bible Study leh Pathian biak inkhawm bak ah hian leadership training leh mission rawngbawlna kawnga hmalak dan tur inrawn hona hun te neih a ni bawk.

February ni 20, thawhlehni khan kikawn kohhran te chu Baptist Counselling Centre, Ramzotlang, Serkawn ah hnatlang in an thawk chhuak a. Kohhran member 38 thawk chhuak in, khum 32 lai an siam a ni.

February 17 leh 20 khan Maudarh khaw bul-a Mizorama zo sap missionary hmasa ber Pu Buanga (Rev. J.H. Lorrain) tawngtaina hmun hriatrengna MTKP in an siam chu a thuziak leh a hmun hma chei that hnatlang an thawk a. Hnatlang-ah hian MTKP hruaitute, Leite Unit leh Leite Bial Pastor Bial TKP hruaitute an thawk chhuak a ni.

February 19, 2024 (Thawhtanni) khan Relief & Development Department-a thawktute - Director, Rev. L. Vanlalsanga leh Nl. T. Lalfawnveli, Astt.Coordinator te chuan Thaizawl Relief Camp, Lunglei District-a raltlante tlawhin tanpuina an pe a. Tanpuina hi school sakna tur cheng sing 4 an pe a ni. Thaizawl-ah hian Raltlan chhungkaw 183 awmin mi 860 vel an la khawsa mek a ni..

February 20, 2024 khan, BCM Chanmari, Aizawl chuan an Kohhran din champhaphak vawi 25-na (Silver Jubilee) denchhen leh a lawmna pakhat atan Medical Free Clinic an buatsaih a. He free clinic hi Chanmari Local Council huam chhung mipui te leh an kohhran memberte tana buatsaih ani a, Chanmari veng thenawm atang pawhin chhimtu engemawzat an awm. Damlo inentir zawng zawng hi mi 350 chuang an ni.

February 15 atanga ni 18, 2024 chhunga Mizoram Baptist Kohran Hmeichhe Pawl (MBKHP) Inkhawmpui vawi 51-na Lungsena neih chu zawh a ni a, palai leh mikhual in ziak lut hi 4500 chuang an ni a, rorel palai hi 627 an ni.

Mizoram Baptist Kohhran hnuaia Nurse hna thawk hmasak berte zing ami leh Pension thlenga lo thawk tawh, Pi K. Lianchhingi, Lawngtlai chuan February 14, 2024 (Chhun dar 12:30) khan kum 94 mi niin chatuan ram min pan san ta. Hemi ni vek hian an chenna Salem, Lawngtlai-III lamah ah phurh phei a ni a, zanah tlaivarpuiin, a tuk, February 15, 2024 (Ningani) chhun dar 11:00 khan Rev. Lalbuakhlua Chawngthu-in vuiin, Salem thlanmualah ropui taka thlah liam a ni.

February 15 (Ningani zan) atang hian Mizoram Baptist Kohran Hmeichhe Pawl (MBKHP) Inkhawmpui vawi 51-na leh Rorel vawi 74-na chu LGSC Khelmual, Lungsen ah tan a ni dawn ta. Inkhawmpui thupui-ah  “Tho la, i Pathian ko rawh" (Jona 1:6) tih hmangin, Speaker-ah Rev. K. Lalnunsanga, Bialtu Pastor, Aizawl Central Pastor Bial a ni ang.

February 17, 2024 (Nilaini) khan Serkawn pastor Bial BMP te chuan Bial BMP Rorel thu passed bawhzuiin Christian Hospital, Serkawn tan Poor Patient Fund cheng sing khat (Rs. 10,000/-) an pe. Thilpek hi Upa Dr. Lalramzauva, Director, Medical & Helath Department-in a Office-ah lo dawngin, thilpek petute hnenah lawmthu a sawi a ni.

February 12, 2024 khan Mualthuam North Pastor Bial KNP hruaitu te pualin Mualthuam North Sunday School Hall ah training neih a ni a, KNP Leaders Trainer - Tv. Lalramhluna chu zirtirna petu atan hman a ni.

February 9-11 ,2024 hmang khan TKP Bethel Pastor Bial, Champhai  chuan Bial TKP Meet vawi 1-na Zokhawthar ah an nei a. Thuhriltu 12:1 thu -  'I Siamtu hre reng rawh' tih thupui ah hmangin, Speaker-ah MTKP Secretary Rev. F. Zorinkhuma an hmang. Speaker bakah hian MTKP hruaitute atangin executive committee member pahnih - Rbt. K Zosiamliana leh Pu P. Lalremruata  ten meet hi an hmanpui a, zaithiam Rebek F. Lallawmzuali’n zaia rawngbawlin a tawiawm bawk.

February 8 -11, 2024 chhung khan Lairam Isua Krista Baptist Kohhran Hmeichhe Inkhawmpui vawi 25-na Sangau-II Biak In-a neih a ni a, Rbt. H. Lalkimi, Vice President leh  Upa B. Singpari - Executive Committee member te chu MBKHP aiawhin an palai.

February 10, 2024 (Inrinni) khan Baptisma, Intermediate leh Senior ‘A’ zirlaite leh zirtirtute pualin   Lawngtlai East Pastor Bial chuan Lawngtlai Vengpui ah Sunday Shool Meet an nei a. Upa Saihmingliana’n zirtirna pe in he meet hi a hmanpui

February ni 11, 2024 (Pathianni) khan Students Christian Movenment of India (SCMI) AICS Unit ten Inter-Cultural Worship tlai lam leh zan lamah an hmang a. Tlai lam programme hi dar 3:00 ah tan a ni a, Zirlai zirtirtu te hnam hrang hrang kalkhawm an nih ang in mahni hnam incheina theuh nen an kalkhawm a, special item neitu te pawhin hnam hrang hrang zia rang pho lang thei zawng in hun an hmang a, Dr. Andrew Lalhmangaiha hnen atangin hnam hrang hrang Pathiana inpumkhatna thuchah ngaihthlak a ni.

February 9-11 ,2024 hmang khan TKP Bethel Pastor Bial, Champhai  chuan Bial TKP Meet vawi 1-na BCM Biak In Zokhawtharah an nei a. Thuhriltu 12:1 thu -  'I Siamtu hre reng rawh' tih thupuiah hmangin, Speaker-ah MTKP Secrear Rev. F. Zorinkhuma an hmang. Speaker bakah hian MTKP hruaitute zing atangin Executive Committee member pathin - Rbt. K Zosiamliana leh Pu P. Lalremruata  ten TKP Meet hi an hmanpui a, Zaithiam F. Rebek Lallawmzuali (Becky Fanai)-in zaia rawngbawlin a tawiawm bawk.