October 22 Pathianni khan Hrangchalkawn Pastor Bial enkawltu – Bialtu Pastor atana Administrative Committee in a ruat  - Rev. Lalrammuana Poonte lakluhna leh Lawmna Inkhawm, BCM Biak In, Hrangchalkawnah neih a ni a. Rev. Vanlalmuankima, Director, Pastoral Department-in inkhawm a kaihruai a, Hrangchalkawn Bial Secretary-in Bial hruaitute inhmelhriattirna a neih zawhah, Bial Chairman-in Pastor thar lawmluhna a nei bawk.

October 20-22, 2023 khan Chawngte East Pastor Bial leh Chawngte West pastor Bial BMP te chuan bial Inkhawmpui an nei a. Chawngte East Bial chuan BCM Biak In, Chawngte ‘P’ ah ‘Pa dinhmun leh mawhphurhna” tih thupuia hmangin Inkhawmpui hi an nei a. Speaker-ah Rev. H. Lalfakzuala, MBMP Secretary an hmang.

Aizawl Area TKP buatsaihin Aizawl Area huam chunga Bial TKP hrang hrang huapa Bible Quiz buatsaih chu, October 20, 2023 (Zirtawp zan) khan Final inelna neih a ni a, hemi zan hian lawmman sem nghal a ni. Intihsiakna hi October 12 & 13 khan BCM City Church, Kohhran Hall-ah neih a lo ni tawh a, Quiz Master - Tv. Vanlalruata, ni in Aizawl Area huam chhunga Bial TKP -12 te inelna ah hian an tel.

Baptist Youth Fellowship India (BYFI) buatsaih - National Baptist Youth Conference 2023 chu October 19-22, 2023 chhung khan Centenary Baptist Church, Secunderabad, Telangana ah neih a ni a, thupui atan Philippi 1:21 behchhanin "Living Christ in India today" tih hman a ni.

Tunkar zirtawpni, October 20, 2023 khan Headquarters Office-a thawktu ten faina hnatlang an nei a. Thawktu te hi group hrang hrang panga ah in then in, Headquarters office leh a chhehvel an ti fai a, damlohna, Committee leh duty pawimawh dang avanga tel thei lo tih loh chu thawktu ten he hnatlang hi ngaipawimawhin an thawkchhuak tha hle a ni. Tun dinhmun ah Headquarters Office ah hian thawktu mi 73 an awm mek a ni.

Tun hnaia Ramthim rawngbawlna thu thar kan hriat theih te lo tarlang i la:-

October 19 & 20 hian Baptist English School, Serkawn chuan Zorema Khiangte speaker a hmangin BCM Biak In, Serkawn-ah Gospel Meeting an nei mek a. Gospel Meeting-ah hian speaker thuchah bakah Naupangte mamawh dan angin Conselling Class te neih a ni a, Pathian faka zaihona leh inhlantharna hun te neih a ni bawk.

October 17, 2023 atang khan Pastoral Committee buatsaih-in a vawikhatna atan Christian Hospital Serkawn ah 'Pastoral Counselling & Chaplaincy Training' buatsaih a ni a.  He Training hi thla thum chhung awh tura ruahman a ni a, training thla khat chhunga karkhat zel hi Christian Hospital Serkawn ah dawhkana zirtirna (lecture) ngaithla in hun an hmang ang a, kar thum dang hi pastor bial emaw an awmna ah emaw tih tur an pek te ti in hun an hmang ang.

Manipur buaina avanga zohnahthlak tam tak, Mizorama raltlana awm te tlawh leh chhawmdawlna pek thawh li-na atan October 17, 2023 khan Thingdawl Relief Camp-ah R&D Relief Team te an kal a. Pu Lalrinawma, Coordinator leh Nl. T. Lalfawnveli, Asst.Coordinator te kalin chhawmdawlna cheng nuai 2 leh sing ruk man – Bufai, Alu, Dal, Chini leh nitin mamawh hrang hrang te an sem a ni.

October ni 15, 2023, Pathianni hmang khan MtKP hruaitu ten West Phaileng Bial an tlawh a. He hun ah hian M|KP hrauitu te a\angin mi pali - Pu K.Lalawmpuia, Asst. Secretary leh Executive Committee member pathum - Pu PC Lalbiakdika, Nl. Nancy Lalmuankimi leh Rbt. K.Zosiamliana te an kal.

Worship Department Committee in "Worship Trainers' Manual buatsaih ni se" tia a rel, worship trainers ten an buatsaih chu October 13, 2023 khan Headquarters Office ah trainers te hi kal khawmin an thlir ho a. Siam that ngai lai te siamtha in, belh ngai te an belh a, Worship Department Committee a thlirho tura chawp chhuah a ni leh ang.

October 14, 2023 (Inrinni) nileng khan Communications Department buatsaih-in Aizawl khawpui chhunga Pastor Bial leh Tualchhung Kohhran Chanchinbu leh Media Cell enkawltu te  pualin “Kristian Communications Worskshop”, BCM Central Church, Upper Republic, Aizawl ah neih a ni

Rev. Pc.Lalsanglura, Bialtu Pastor, Hrangchalkawn Pastor Bial chu October 11, 2023 (Nilaini) zan dar 8:45 khan, Stroke avangin Chatuan ram min pan san ta. Rev. Pc.Lalsanglura hi October 12, 2023 - chawhhnu dar 01:00 ah BCM Biak In, Central Church, Aizawl-ah vuina Inkhawm neihpuiin, Venghlui thlanmualah ropui taka thlahliam a ni.

October 11, 2023 khan Dimapur, Nagaland atangin Western Sumi Baptist Association hruaitu mi pali te chu Mizoram Baptist Kohhran  inrelbawlna zir chiang turin BCM Headquarters an rawn thleng a. General Secretary leh Headquarters a hruaituten lo dawngsawngin, October 12 atang khan Headquarters Office- Committee room-ah inkawmhona leh BCM kalphung te inkawhhmuhna an nei.

Mizoram Baptist Mipa Pawl (MBMP) Executive Committee meeting August ni 31,2023 a neih chuan   Mizoram Baptist Mipa Pawl thil pawimawh leh ṭulte vawn ṭhat kawngah leh Hma lakna leh rawngbawlna mumal zawka puanzar a nih theih nan Media Cell a din a.  October 12, 2023, (ninga ni) chawhnu dar 2:30 khan Hotel Elite Venglai, Lunglei ah a vawikhatna atan an thukhawm.