Vawiin, January 11, 2024 hi Mizoram-a Missionary hmasa ber lo thlen champha phak, vawi 130-na “Missionary Day” a ni a. Kumin Missionary day Thupui atan “Kohhran Hnapui – Chanchin Tha Hril” (Marka 16:15) tih hman a ni. He Ni hi ram pumah hman a nih theih nan Mizoram Sorkar chuan Sorkar chawlh (State Holiday) atan a puang thin a, kuminah pawh Sorkar chawlh-ah puangin, Kohhran hrang hrang ten awmni khamin ruai nen hun an hmang a ni.

January 5,2024 (Zirtawpni) Thingfal khawpui chhunga Kohhran pakhat BCM Mamte ‘T’ Biakin chu Rev.Dr.Lalzarliana, Director, Communications, Literature & Printing Dept, BCM Headquarters chuan a hawng. Zaithiam Sailo Lalsangzuali, BCM Moria, Rahsiveng chuan Communications Director hi tawiawmin, Biakin hawnna Inkhawmah zaia rawngbawlna a nei bawk. Thingfal Pastor Bial hruaitute leh a chhehvela Kohhran ho bakah hmun hrang hrang atangin Biakin hawn hi an rawn chhim a. Tin, Kohhran pawl dang, UPC, Presbyterian leh Salvation Army hruaitute an lo tel bawk a, hlim takin ruai nen hun hman a ni.

Mizoram Baptist Kohhrana thawktu te chuan January 10, 2024 (Nilaini) chawhma dar 11:30 khan  kum thar atana Inhlantharna hun an hmang. Lunglei-ah chuan Headqurters Office, Serkawn leh Lunglei-a Kohhran zirna in leh Office hrang hranga thawktu ten inhlantharna hi BCM Hall, Serkawn-ah an nei a, Rev. R. Lalnunzira, Associate General Secretary, Service in Inkhawm a kaihruai a. Pu V. Vuansanga, Principal, HATIM-in Pathianthu chhiarin tawngtaina a neih hnu-ah General Secretary Rev. R. Lalbiakliana’n Thawktute lawmna leh chibaibukna sawiin, BCM dinhmun leh hmalakna tlangpui a tarlang bawk.

January 9, 2024 (Thawhlehni) khan Mizoram Baptist Kohhran chuan Kum thar atana Office kai ni hmasa ber hmangin Office an hawng tan leh ta.  BCM thawktu hmun hrang hranga Christmas leh Kumthar hmanga zin chhuak te leh mahni hmun lama hawte pawhin Office kaini hmasa ber hi ngai pawimawhin an rawn haw kim  thei vek a, thawktute zingah damlohna avanga kal thei lo leh Duty pawimawha kal te tih loh chu Office an kai tha hle a ni.

Kohhran hnuaia thawktu Department hrang hrang-a nitin Office kal te chuan December ni 15, 2023 (Zirtawpni) atangin Krismas leh Kumthar chawlh an hmang tan ta a, hemi chhung hian Headquarters Office te, Executive Secretary Office, Aizawl leh Lawngtlai te leh department Office dang te pawh khar a ni. Hetih lai hian, Hospital, zirna in te leh home te chu anmahni remchan leh kalphung pangngaiin an kal ang a, Department hotute ruahman angin  duty leh hna kallai pawh a pangngaiin an kalpui zel rih ang.

December 14, 2023 (Ningani) zan khan Communications Department buatsaih - Fak Lam (Worship Dance) intihsiak Lawngtlai Area aṭanga Final Round-a tel tur te thlanna, BCM Biak In, Lawngtlai Vengpui-ah neih a ni a. Intihsiakna hi Lawngtlai Area ṬKP Coordination Committee ten buaipuiin, Nl. Zohlimpuii Chhakchhuak-in a kaihruai a. Fak lam Organising Chairman Rbt. Elvis Lalthangzuala’n hunserh hmangin, Organising Secretary Teddy Lalrinliana Aineh-in report a pe a, Nl. T. Lalhlimpuii leh Emely Laldinmuani te’n fakna hla an sa bawk. Tel zawng zawngte hnenah lawmman sem a ni a, Pu Joseph Lalhmingthanga Chinzah, Chairman, Lawngtlai Area ṬKP Coordination Committee-in lawmthu sawina leh ṭawngṭaina-in hun a khar a ni.

Administrative Committee-in ruahmanna a siam angin Executive Secretary Office, Aizawl chu Baptist House, Upper Khatla atangin  December  14, 2023 khan Baptist Centre, Falkland-ah in sawn fel a ni a, December 19-ah Baptist Centre leh ES Office Pathian hnena hlanna leh hawnna hi neih a ni ang.

December  14, 2023 (Ningani) chawhnu dar 01:00 khan Jubilee Bible School chuan BCM Biak in, Ramzotlang, Serkawn – ah Zirlai chhuak turte Certificate hlanna leh thlahna Inkhawm, Graduation Service an hmang.

December 13 zan atanga ni 14  khan Baptist Boarding School,  Chawngte chuan kum 50 an tlin champhaphak ‘Golden Jubilee’ an lawm a. He hun hmanpui hian Headquarters atangin Rev. Dr. R. Lalthanmawia, AGS Mission, Rev. Lalremsiama Ralte, Mission Director, F. Lalrammmawia, Production Assistant leh Pu H. Lalrinpuia Driver te an kal a.  He school zirtirtu lo thawk tawh te leh zir chhuak tawh hmun hrang hrang atanga tel an awm bawk.

December 12, 2023 khan BCM Administrative Committee ruahmanna-in Christmas Charity Programme,  BCM Mual, Serkawn-ah hman a ni a. Chawhnu dar 2:00 atangin sumtuakna dawr leh intihhlimna hrang hrang  te hawn a ni a, LMC Area Bial TKP leh Bial BKHP ten buaipui in hun tha tak hman a ni. Zan dar 6:30 ah Charity Concert nei in, Nl. Lalhmingmawii Chongthu-in hun vawngin a kaihruai a, item hrang hrang - mal zai, Zaipawl, Live Band leh Group zai , Worship Dance leh Skit te awm in hun hman a ni.

Mizoram Baptist Kohhran, Headquarters Office-a Driver hna thawk mek, Vanlalfaka Sailo, chu December 12, 2023 chawhnu dar 12:30 khan K. Lalthazuali D/o K. Laltanpuia(L) BCM kikawn  nen BCM Biak In, Zotlang North-ah Kohhran Danpuitlingin  an innei a. Inneihna ah hian Headquarters Office thawktu engemawzat in an tawiawm a ni.

December ni 8, 2023 chawhnu dar 1:00 khan Baptist Higher Secondary School, Serkawn-a zirtirtu hna thawk Supperanuation pension-a chhuak tur Pi R. Lalramthangi thlahna neih a ni a, thawktute leh School naupangte bakah zirtirtu leh thawktu Pension-a chhuak tawh te engemawzatin an telpui a ni.

December 8, 2023 (Zirtawpni) khan Sap Upa leh Pu Buanga Hall, Serkawn-ah Assembly Nomination Committee Meeting neih a ni a.  Tun tum Nomination Committee Meeting-ah hian Assembly 2024 Thupui atan “Inpumkhatna” (Johana 17:21)  tih chu thlang in, thuchah sawitu tur te, zing Bible Study kaihruaitu tur leh Lalpa zanriah Sacrament buatsaihtu tur te bakah, chanvo neitu tur hrang hrang te an ruat bawk.

Pastors' Conference thupui atan hian   “Hetah hian awm ula, mi venpui rawh u" (Matthaia 26:38) tih thu hman a ni a, speaker pathum Rev. R. Thanmawia, Rev. Lalremsiama Ralte leh Rev. Dr. R. Lalthanmawia ten thupui hmanga thuchah an sawi bak ah thupui pali; 'Mipa leh mipa leh hmeichhia leh hmeichhia inkawp chungchang', 'Tunlai khawvela Pastor te tih tur leh  te tih tur", "Mi dang chhul hmanga fa pai chungchang' leh "Baptist Kohhran kalphung leh hmel hmang" tih te zir hovin, sawihona hun te an hmang bawk.

December 7,2023 (Nilaini) khan Mizoram Baptist Kohhran, Finance  & Pension Committee Meeting Sap Upa leh Pu Buanga Hall, Serkawn-ah neih a ni a, Committee hi President, Rev. KV Thanga’n a kaihruai a, General Secretary Rev. R. Lalbiakliana’n BCM sum report tlangpui a pe. Department Annual  Plan leh Achievement Report te ziaka sem a ni.