Mizorama Chanchintha lo thlen dan Documentary Film, Mingo Hnuhnung chu tunkar thawhtanni December 4 - 7 inkar khan AICS ah Shooting neih a ni a, hei hi a hmawrbawkna tih loh ah chuan shooting neih hnuhnung ber a ni tawh dawn a ni. Ruahman ang chuan December thla tawp leh January thla tir ah a hmawrbawkna hi neih a ni ang.

December 7, 2023 (Ningani) khan BCM Relief & Development Department hnuaia Skill Development Training hrang hranga zir chhuak mi 25 pualin R&D Training Centre, Ramzotlang-ah Graduation Day hman a ni a.  Rev. R. Lalnunzira, AGS – Service chu chu khuallian-ah hman a ni.

AICS Zirlai te chuan kumin atana an zirna hun chhung hmang zo  in, December 7, 2023, Ningani khan College chhuahsan in mahni khaw lam panin an haw. AICS hian tunkar chhung Thawhtan atang khan Annual Sport an hmang a, Nilai zan ah Pre-Christmas Celebration hmangin, he hunah hian BCM Central Bial Zaipawl ten zaia rawngbawlna neiin hun an hmanpui a, Rev. PC Muanthanga'n  thuchah a sawi.

December 6, 2023 Chawhma dar 10:00 khan kum 2024 BCM Calendar leh Diary chu BCM Hall, Serkawnah Rev. R. Lalnunzira, AGS-Service-in Pathian hnenah hlanin, a tlangzarh. Tlangzarhna hun tawi ah hian Rev. Dr. Lalzarliana, Director, Communications Department-in Calendar leh Diary buatsaih dan tlangpui a sawi bawk.

MBKHP Inkhawmpui 2024 dawltu tur Lungsen Pastor Bial chu Pandal Sak tan turin ruahmanna an siam mek a. Pandal Structure phurtu lirthei te kawng lakah a chhiat avangin tum hunah pandal sak tan hna hi thawh theih a ni ta lo a ni. December 5, 2023 (Thawhlehni) khan Lungsen Pastor Bial BMP te chuan pandal sakna tur hmun leh a vel te sam fai hnatlang thawkin, member thahnem tak an thawk chhuak a ni.

December 5, 2023 (Thawhlehni) chawhnu dar 1:30 khan School of Nursing, Christian Hospital, Serkawn chuan General Nuring & Midwifery (GNM) batch tharte pualin Capping & Lamp Lighting leh GNM zirchhuak te tirhchhuahna ‘Graduation Service’ an hmang a. Rev. KV Thanga, President BCM chu khuallian niin, Zirlai te tawiawmtu an chhungte bakah sawm bik mi thehnem tak an tel a ni.

Tun tumah hian Canadian Baptist Ministries, (India) hruaitu mi pathum  leh Canadian Baptist Ministry thawhpui te Nagaland leh Odhisa atanga Baptist Association hrang hrang -a thawktu  mi 12, an vaiin mi 15 an rawn kal a. BCM R&D thawktuten Director Rev. L. Vanlalsanga hovin an lo dawngsawng a ni.

ṬKP Zotlâng Pastor Bial, Aizawl te chuan December 1, 2023 (Zirtawpni) zan khan BCM Biak In Aizawl West ah Advance Christmas an hmang a, TKP member ten an hlutin, Bial chhung Unit tin atangin TKP member te an kal tha hle. Guest Artist atan Tv C.Vanlalmalsawma (Sawmtea Chhangte) leh Tv. Thawhlehnaniropuia (Puipui-a)ten hun hmanpuiin, Bial chhung Unit hrang hrang aṭangin Zaithiam zai leh Item hlimawm tak tak thlir leh ngaihthlak a ni bawk.

Bangladesh buaina avanga zohnahthlak tam tak, Parva Mizorama raltlana awm te tlawh leh chhawmdawlna pe tur hian BCM Relief Team te- Rev. L. Vanlalsanga Director,  Lalrinawma, Coordinator leh Nl. T. Lalfawnveli, Asst.Coordinator te an kal a. Tanpuina cheng Nuai 1 leh Singthum man hu an sem a, heng an thilpek te hi buhfai, alu, tel, chi, chini, silpouline bak ah nitin mamawh chi hrang hrang te an ni.

Rev. Dr. R. Lalthanmawia, AGS Mission chu Tunkar chhung hian Tripura Field tlawhin a zin chhuak a. Tripura-ah hian Mission rawngbawlna hmun hrang hrang te tlawh leh thawktute nen inrawnkhawmna te nei in hun an hmang a, November ni 30 khan St.James Higher Secondary School, Gongarai-ah Missionary nupui te pualin Retreat a a neihpui a, December 1-3 hian TBCU Pastor Conference-ah Speaker niin hun a hmanpui leh mek a ni.

Bookroom hawnna inkhawm hi November 28, 2023 zing dar 7:30 ah neih a ni a, Rev. PC Lalropuia, Bialtu Pastor Champhai Bial-in kaihruaiin, Rev. Vanlalnghaka Jongte, Bialtu Pastor Bethel Bial, Champhai in Bookroom dinhmun leh tuna buiding siam dan report tlangpui a pe a, Rev. Dr. Lalzarliana’n hawnna leh Pathian hnena hlanna a nei. -Lalpa tawngtainain hun khar ani.

Tunkar Pathian Ni, December 3, 2023 hi khawvel huapa Kristiante Ni Pawimawh “Bible Sunday” a ni a, Mizoram Baptist Kohhran pawhin he Ni hi urhsun takin a hmang thin a,  Tualchhung Kohhran tinah Bible Society rawngbawlna lam thuchah leh campaign nan hmangin, Bible Society hmunpui atanga chhiar thuchah chhiar tura buatsaih te chhiarin hun hman thin a ni.  Kumin Bible Sunday thupui chu “Pathian thu, mihringte khâwnvâr (Sam 119:105) tih a ni a, Bible Sunday puala Kohhran hote hnena thuchah chhiar tur Nipawimawh Programme-ah tarlan a ni.

Indian ram sorkar hnuaia Tuihna humhalh kawnga hma latu, Ministry of Jal Shakti (Department of Water Resources) chuan BMS Missionary- Sap Upa leh Pu Buanga ten an siam, Saptui, Serkawn, Lunglei ami chu India rama tuihna humhalh leh enkawl tha leh tlo 75 a thlan zingah a telh a. Hemi chungchang tarlanna leh  Water Heritage Forthnight kharna Inkhawm hi Saptui, Serkawn-ah November 30 zing dar 7:30 khan neih a ni.

Rev. R. Lalbiaklian, General Secretary chu Aizawl East ABC Rorel leh Inkhawmpui a hmanpui zawh-ah Assembly-thurel ‘Delhi-ah BCM-in hmun hma nei tura hma lak ni se’ tih bawhzuiin Delhi-ah a tlang nghal a, New Delhi-ah hian Administrive Officer, Pu Lalruatkima nen BMS-India hotute leh BCTA hotute nen inkawmna neiin, BMS hmun hma chhuahsan tak ram enkawl chungchang te an sawipui a.

November 27 – December ni 1 chhung khan Serkawn Kohhran te chu Bru Mission-a kan rawngbawlna hmun hrang hrang – Zochachhuah, Hruitezawl leh Ngengpuitlang te tlawhin an kal a. An kalna khuaah te hian Medical Free Clinic neiin, Doctor pathum leh Nurse engmawzat bakah Medical lama thawktu te telin Medical Clinic hi an buaipui a. Damlo te hi an mamawh damdawi te pawh a thlawnin an pe  nghal a ni.