October 29, 2023 (Pathianni) chawhnu dar 2:30 khan BCM hnuaia thawktu thi te ralna dan (Workers Condolence Scheme) hmanga tih thin angin, Rev. Pc. Lalsanglura, Hrangchalkawn Bial enkawltu, October 11, 2023-a chatuan ram pan ta chu ral a ni.

Tunkar thawhlehni atanga zirtawpni khan Assembly hnuaia Committee hrang hrang pali - Relief & Develoment Deparmtent Committee, Christian Education Committee, Communications Deparmtent leh Fellowship Department te Headquarters Office Committee Room No. 1 ah an thukhawm. Committee hrang hrang Report leh thurel tlangpui hetiang hi a ni.

October 27, 2023 (Zirtawpni) chawhma dar 11:00 khan Sap Upa leh Pu Buanga Hall, BCM Office, Serkawn-ah R&D tirha General Nursing & Midwifery, Christian Medical Centre, Pithapuram, Andra Pradesh-a zir tur mi panga te ko khawmin an hriat tur tul pawimawh hrang hrang kawhhmuhna (Orientation Programme) buatsaih a ni.

Mizoram Baptist Kohhran, Pastoral Department leh AICS tangkawpin an buatsaih thin Pastor Refresher Course chu October 26 atanga tanin, November 9, 2023 thleng AICS ah neih a ni leh ta a. Tun tuma Pastor Refreshers Course nei tura Bialtu pastor thlan chhuah te chu hengte hi an ni.

October ni 25, 2023 khan Baptist English School, Serkawn leh BES Extension, Falkawn-a thawktute chuan Rev. Dr. H. Lalthlamuana, Executive Secretary, Lawngtlai Area speaker-a hmangin Arthington Hall, BES, Serkawn-ah intuaitharna (Retreat) an nei. Retreat hi Session hnih-ah then niin, chawhma session-ah – Zirtirtu leh kohhrana thawktute mawhphurhna hrang hrang leh awm dan tur zirho a ni a. Session hnihna, chawhnu lamah – Thawhhona chungchang leh Sam 73-na zirho a ni.

Higher and Technical Institute, Mizoram (HATIM) chuan hma sawn ve zelin, tun hnai khan HATIM-a Department pali - English, Philosophy, Social Work leh History te chuan Mizoram University (MZU) hnuaia Permanent Affiliation an nei thar.  Heng department permanent affiliation hmu thar te bakah hian a hma-in deparmtent pahnih – BCA leh B.Com te chuan affiliation hi lo nei tawhin, tun dinhmunah HATIM a Department hrang hrang pariat zinga paruk-in permanent affiliation hi an nei ta  ni.

October 21, 2023 (Inrinni) khan Serkawn Kohhran chuan Baptist English School kawt zawlah Kum lama Upate pualin hun an hmang a. He hunah hian Serkawn Kohhran huamchhunga kum 70 chunglam mi 66 atangin mi 48 an kal khawm a ni.

October 22 Pathianni khan Hrangchalkawn Pastor Bial enkawltu – Bialtu Pastor atana Administrative Committee in a ruat  - Rev. Lalrammuana Poonte lakluhna leh Lawmna Inkhawm, BCM Biak In, Hrangchalkawnah neih a ni a. Rev. Vanlalmuankima, Director, Pastoral Department-in inkhawm a kaihruai a, Hrangchalkawn Bial Secretary-in Bial hruaitute inhmelhriattirna a neih zawhah, Bial Chairman-in Pastor thar lawmluhna a nei bawk.

October 20-22, 2023 khan Chawngte East Pastor Bial leh Chawngte West pastor Bial BMP te chuan bial Inkhawmpui an nei a. Chawngte East Bial chuan BCM Biak In, Chawngte ‘P’ ah ‘Pa dinhmun leh mawhphurhna” tih thupuia hmangin Inkhawmpui hi an nei a. Speaker-ah Rev. H. Lalfakzuala, MBMP Secretary an hmang.

Aizawl Area TKP buatsaihin Aizawl Area huam chunga Bial TKP hrang hrang huapa Bible Quiz buatsaih chu, October 20, 2023 (Zirtawp zan) khan Final inelna neih a ni a, hemi zan hian lawmman sem nghal a ni. Intihsiakna hi October 12 & 13 khan BCM City Church, Kohhran Hall-ah neih a lo ni tawh a, Quiz Master - Tv. Vanlalruata, ni in Aizawl Area huam chhunga Bial TKP -12 te inelna ah hian an tel.

Baptist Youth Fellowship India (BYFI) buatsaih - National Baptist Youth Conference 2023 chu October 19-22, 2023 chhung khan Centenary Baptist Church, Secunderabad, Telangana ah neih a ni a, thupui atan Philippi 1:21 behchhanin "Living Christ in India today" tih hman a ni.

Tunkar zirtawpni, October 20, 2023 khan Headquarters Office-a thawktu ten faina hnatlang an nei a. Thawktu te hi group hrang hrang panga ah in then in, Headquarters office leh a chhehvel an ti fai a, damlohna, Committee leh duty pawimawh dang avanga tel thei lo tih loh chu thawktu ten he hnatlang hi ngaipawimawhin an thawkchhuak tha hle a ni. Tun dinhmun ah Headquarters Office ah hian thawktu mi 73 an awm mek a ni.

Tun hnaia Ramthim rawngbawlna thu thar kan hriat theih te lo tarlang i la:-

October 19 & 20 hian Baptist English School, Serkawn chuan Zorema Khiangte speaker a hmangin BCM Biak In, Serkawn-ah Gospel Meeting an nei mek a. Gospel Meeting-ah hian speaker thuchah bakah Naupangte mamawh dan angin Conselling Class te neih a ni a, Pathian faka zaihona leh inhlantharna hun te neih a ni bawk.

October 17, 2023 atang khan Pastoral Committee buatsaih-in a vawikhatna atan Christian Hospital Serkawn ah 'Pastoral Counselling & Chaplaincy Training' buatsaih a ni a.  He Training hi thla thum chhung awh tura ruahman a ni a, training thla khat chhunga karkhat zel hi Christian Hospital Serkawn ah dawhkana zirtirna (lecture) ngaithla in hun an hmang ang a, kar thum dang hi pastor bial emaw an awmna ah emaw tih tur an pek te ti in hun an hmang ang.