October 14, 2024 cham-in Canadian Baptist Ministries (CBM) hotu, Senior Program Coordinator - Pu CP Raju chuan Mizoram Baptist Kohhran, R&D rawngbawlna a rawn tlawh a, R&D Coordinator Rbt Lalrinawma, Asst.Coordinator - Nl. T. Lalfawnveli leh Field Facilitator – Nl. Laldinthari ten lo dawngsawngin, CBM leh BCM Relief & Development Department thawhhona-a Youth skill Develooment Project hnuaia Training centre hrang hrang te an tlawhpui a ni. Project te tlawhpui a nih bakah R&D hotute nen Inkawmhona neih zui a ni a, Project kalpui zel dan tur leh Sustainability Project 2025-2027 atana an duan bawhzui dan tur te sawihona neih a ni.  R&D mikhual pawimawh hi October 16 (Nilaini) khan Lunglei chhuahsan in a hawng leh ta a  ni.

Mizoram  Baptist Mipa Pawl (MBMP) Inkhawmpui 2026 atana Logo tur chu mi hrang hrang hnenah siam tirin Executive Committee chuan an duh an thlang fel ta a, MBMP Inkhawmpui chungchang Official leh Programme hrang hrangah te hman theihin an pho chhuak ta.

Mizoram Baptist Kohhran Pastor Bial hrang hrangah Bial Rorel neiin, Zirtawp zan atang khan Inkhawmpui programme hman tan a ni a, Inrinni zan, Pathinni nileng leh Pathianni zanah te Kohhran pum huap programme siamin Pathianni zan-ah Inkhawmpui hi an tiak dawn a ni. Pastor Bial Rorel hi Mizoram Baptist Kohhran Pastor Bial hrang hrang 92-ah neih a ni a, General Secretary, Rev. Dr. R. Lalbiakliana chuan Pastor Bial hrang hrang inkhawmpui nei mek te hlawk tak leh hlim taka Inkhawmpui an hman theih nan duhsakna leh chibaibukna a hlan a ni.

October 8, 2024 khan Board of Theological Education of the Senate of Serampore College (BTESCC) buatsaihin Church Leaders Meet chu Regency Hotel, Zarkawt, Aizawlah neih a ni a, Kohhran hrang hrang panga atangin aiawh 45 an kalkhawm a, Mizoram Baptist Kohhran atangin General Secretary, Rev. Dr. R. Lalbiakliana hovin mi 14 lai an tel a ni. Senate of Serampore College atangin Rev. Dr. Limatula Longkumer, Registrar, Dr. Aswathy John Dean of SATHRI/ Research Dept. leh Rev. Dr. Rodinmawia Ralte, Dean of SCEPTRE & Secretary BTESSC te an rawn kal a ni.

October ni 7, 2024, Thawhtanni chawhnu dar thum khan AICS Faculty quarters thar hawnnna leh AICS kum 25-na hriatrengna atana Jubillee Multipurpose Hall lungphum phumna neih a ni a. Quarters hawnna inkhawm hi Principal Rev. D.C.Vanlaldika'n kaihruaiin, quarters sak dan tlangpui report a pe. Report in a tarlan danin quarters hi a dung feet 60, a vang feet 35 a ni a, a sak nan hian cheng nuai 47 dawn sen a ni. Rev. Dr. R. Lalbiakliana, General Secretary in quarters hi Pathian hnena hlanin tawngtaina hun a hmang a, Luangmual bialtu Pastor Rev. T. Lalawia'n inkhawm malsawmna in a khar a.

RC Vanlalhruaii D/o Lalhmingthangi, Dinthar, Aizawl chu Council of Churches in Mizoram (CCM) Office, Mission Veng, Aizawl-a Office Assistant cum Accountant hna thawk turin thla ruk (six months) chhung atan lak a ni.

October 1-3 hmang khan India Baptist Women’s Union (IBWU) General Assembly vawi 15-na Chennai, Tamilnadu-ah neih a ni a. Inkhawmpui thupui atan I Thessolonica 5:11 tlawh chhanin “I in dawmkang tawn zel ang u” (Build each other up) tih an hmang a ni. He Conference hmang hian MBKHP atangin hruaitute leh member an kal a, Kumin Inkhawmpui-ah hian Kum 2024- 2029 chhung atan India Baptist Women's Union (IBWU) President atan Rbt.Dr. Zoramthangi (MBKHP) chu ruat a ni.

Director, Medical & Health Department report in a tarlan danin – September 2024 chhungin Christian Hospital Serkawn-ah damlo 2560 in entirin, an zinga 370 admit an ni a, nau piang 53 an awm laiin mitthi 11 an nei thung. Report kimchang hetiang hi a hi:-

Assembly Rorel thu pass Ruihhlo do beihpui thlak bawhzuina kal zelah Bial leh Kohhran hrang hrang-ah Ruihhlo do campaign neih chhoh mek a ni a. September 29 (Pathianni) khan BCM Leite-ah Roihhlo do Campaign neiin Social Concern Department Director Rev. L. Vanlalsanga leh Nl. Laldinthari Ralte, Field Facilitator te an kal.

Tunkar Thawhtanni, October 1, 2024 khan Headquarters-a thawktu te chuan faina hnatlang an nei a. Thawktu te hi group hrang hrang ah in then in, Mahni lawina office leh Institution Compound te an ti fai a, damlohna, Committee leh duty pawimawh dang avanga tel thei lo tih loh chu thawktu ten he hnatlang hi ngaipawimawhin an thawkchhuak tha hle a ni.

September 27-29 chhung khan Buarpui South Bial TKP chuan “I nunna turin tlan chhuak rawh”. (Gen 19:17) thupuia hmangin BCM Biak In, Immanuel-ah Bial TKP Intawhkhawm (TKP Meet) leh Bial Rorel an nei a, Speakerah Upa P.C.Vanlalrova, Senior Adviser MTKP an hmang. MTKP atang hian Executive Committee member pahnih Pu Lalrammuana Sailo leh Nl Grace Lalrindiki te an kal bawk. Serchhip Pastor Bial zaipawl te’n zaia rawngbawlin Meet hi an hmanpui bawk. Inrinni zan atanga Pathianni zan thlengin zaia rawngbawlna an nei thin bawk.

Chakma Mission hnuaia Baptist Mission School, Tuichawng a Evan. Teacher thawk lai Upa Ch. Hmingthanga chu October 01, 2024 hian Superannuation pension-a a chhuah dawn tak avangin, September 27, 2024 khan Tuichawngah, Tuichawng Area a thawktuten Chakma Mission pumpui aiawhin ama quarters-ah thlahna an nei.

Baptist Higher Secondary School, Serkawn chuan September 23, 2024 atang khan School Annual Sports an nei a. Thawhtanni khan Lena Studium, Serkawn Melte-ah Opening Ceremony neiin, khuallianah Pu V. Malsawmtluanga, Vice Chairman, HPC, Lunglei an hmang. Zirlai te hi House-ah inthenin Sports Discipline hrang hrang bakah Solo, Beat Conterst, Girls Band leh Cultural Item hmanga Inelna te neih a ni. Vawiin, September 27, 2024 (Zirtawpni) chawhnu hian Sports kharna Inkhawm neiin, Inelna hrang hrang a thi tha te hnenah lawmman sem a ni ang.

September 25, 2024 (Nilaini)chawhnu dar 2:30 khan Upa Biakchungnunga, Office Superintendent, BCM Headquarters Office chu October 1, 2024 atang khian Superannuation pension-a a chhuah dawn tak avangin BCM Headquarters Office-a a thawhpui ten BCM Hall-ah amah thlahna an nei.

September 25, 2024 (Nilaini) zing dar 10:00 khan BCM Hall, Headquarters Office, Serkawn-ah Kohhran Upa Exam Result 2024 tih chhuah a ni a. Rev. Vanlalmuankima, Director, Pastoral Ministry Department in he hun hi kaihruaiin, report tlangpui a pe nghal a, General Secretary Rev. Dr. R.Lalbiakliana’n Result tlangzarhin, Pathian hnena lawmthusawi tawngtaina-in hun tihtawp a ni.